بالفيديو: فاتن الفازع تحتفل بعيد ميلادها الـ 45 .. "مرحبا بالتجاعيد والشيب مادام عندنا الزرارق"

احتفلت الكاتبة التونسية المقيمة بألمانيا فاتن الفازع ليلة الأحد 23 جوان 2024 بعيد ميلادها ال45 بإحدى الملاهي في تونس رفقة أصدقائها المقربين.

ونشرت فاتن الفازع مقطع فيديو على حسابها الخاص توثق من خلاله أجواء عيد الميلاد وتعبّر عن امتنانها وشكرها لكل الذين شاركوها فرحتها.

وقالت في تدوينة أرفقتها للفيديو :"

شمعة جديدة انزادتلي واحتفلت بيها بجهدي الكل ، زادمة عالدنيا كي العادة ، نفكّ ، نهدّ ونعفس ونقول متاعي . الشمعة عدد خمسة وأربعين آما بروح العشرينات . عمري لا عملت عيد ميلاد كبير في حياتي ، ما واتاتش … آما قعدتلي كي الشهوة في قلبي ، نحب يغنيولي برشة عباد ، يجيبولي ڤاتو وننفخ عالشمع كنوع من التكريم للحياة … ڤاتو عيد ميلادي هداتهولي سسونتي ، اللي بخلاف كتبتي زادتني كتاب فن اللا مبالاة ، خاطر بالنسبة ليها يمثّلني .

يمثلني خاطر عشت الخمسة والأربعين حسب قناعاتي ، عملت كان اللي يفرّحني ، ويرتّحني وقدت حياتي كيما حبيت ، غلطت ساعات ، كنت انسانة باهية في أغلب الحالات ، عطيت برشة حبّ ورجعلي ثاني ومثلّث .".

مضيفة :"

الراجل اللي نحبو البارح فلّت الطيارة خاطر ألغاوا زوز ترينووات وما نجمش يكون في المطار في الوقت ، اما كان معايا نص اللّيل بالضبط وراء كاميرا تاليفون وفي قلبي .

التصويرة الاخرة في الريل تعبّر عن امتناني لحبيبتي سوسن بورڤيبة ، اللي عطاتني البارح درس في معنى الصداقة والحب اللاّ مشروط . شكرا لكل من جاء وهنّى ، شكرا للحياة ، سعداء بما نحن فيه وأسعد منا بياض الورق .. كل عام وانا حية بألف خير ، كل عام وانا نستعمل في مروحتي السعف وأصحابي موش مصدقين كيفاش نركزها وين ما نمشي ههه وكل عام وانا نظهر عمري الكل ، ما نحبش نظهر أقل منو ، مرحبا بالشيب ومرحبا بالتجاعيد مادام عندنا الصبغة والزرارق في الوجه ( اللي لتوا لا استعملتهم ) حيّ على الحياة".

الفيديو :